Patay nang nakaplagan ang upat ka mga indibidwal sa probinsya sa Davao de Oro, sulod lamang sa usa ka adlaw, kagahapong adlawa, Mayo 13, 2024 sa managlahing lugar.
Unang nakaplagan kagahapon pasado alas-6:00 sa buntag, ang biktima nga nailang si REY FARIN QUIDATO, 44 anyos, sa Purok 1, Bitoon, Barangay Tagdangua, Pantukan.
Narekober sa crime scene ang unom ka basiyo sa bala sa .56mm ug duha ka basiyo sa .45 caliber pistol.
Samtang, pasado alas-9:00 sa buntag nakadawat og tawag ang otoridad nga laing duha ka mga patay’ng lawas na usab ang nakaplagan sa Prk. 1 Barangay Panibasan, Maco nga nailing sila Joseph Mifania Cosal, 40 anyos,minyo,chainsaw operator ug residente sa prk. 5 San Antonio Mabini Davao de Oro ug Aldrin Catubay Dagsangan, 37 anyos, minero sa Post 3 brgy Napnapan Pantukan ug residente sa Prk. 7 Lapinigan Cadunan Mabini.
Narekober sa crime scene ang lima ka basiyo sa .45 caliber pistol ug duha ka basiyo sa 5.56 cal. firearms.
Pagkahapon sa susamang adlaw, nakaplagan ang ika-4 nga patay’ng lawas nga nagkulob ilalom sa kalubihan sa Lawigan, Pantukan. Padayon pang giila ang pagkatao sa nasangpit nga biktima.
Padayon karon ang gihimong imbestigasyon sa Davao de Oro Police Provincial Office kalabotan sa kamatayon sa upat ka mga lalaki nga puros nakaangkon og mga samad pinusilan sa ilang lawas, ug kung unsa ang motibo sa maong krimen.
