KALIBO, AKLAN—Gintawag nga “barbaric act” it 3rd Infantry Division Philippine Army do pagpatay sa sangka army Corporal it mga ginapatihang miyembro it New People’s Army sa Brgy. Lahug, Tapaz, Capiz.
Sa ginpaguwa nga “statement of condemnation”, ginpahayag ni Major General Eric Vinoya, Commander it 3rd ID, nga do gin-obra it mga armadong grupo kay Corporal Frederick Villasis hay sangka desperadong tikang agud nga punggan do ginadaea nga progreso ag kaayusan it mga suldado sa hinterland barangay it Lahug, Tapaz.
Dugang pa ni Vinoya, do nasambit nga mataeaw nga pag-atake hay uman eamang nga nagapakita nga do mga Communist Terrorist Groups hay mga Human Rights violators.
Do nasambit sigon nga ginpatay nga sundalo hay nagaobra malang it anang responsibilidad agud nga buligan do mga residente it Tapaz kung siin kat natabo do pag-abduct kay Corporal Villasis hay ginamuntan kara do mga barangay officials paadto sa munisipyo agud nga magpangayo it bulig nga makapadaea it ambulansya sa nasambit nga barangay agud nga mai-transport do sangka may sakit nga residente ag mag follow-up it pilang proyekto nga makabulig sa pangabuhi sa barangay.
Nasayuran nga si Villasis hay siyam nga dag-on eon sa serbisyo at naka-assign sa 12th Infantry Battalion it 3rd ID ag do team leader it detachment camp sa nasambit nga lugar. // SHERRY ANNE REUNIR-VIDAL
