KALIBO, AKLAN—Sangka Akeanon do nagtao it bugae ag dungod sa nasyon matapos nga makapag-uli it bronze medal sa athletics ku 1964 Tokyo Summer Olympics sa Japan.
Pinaagi sa andang pamilya nga nagpost sa facebook, nataw-an it uman it kabuhi do pangaean ni Nelly Restar-Gonzales, 82 anyos ag presente nga nagaistar sa Brgy. Tigayon, Kalibo, Aklan.
Nakatipon man si Gonzales it 72 medalya sa nagkaeain-eain nga paindis-indis sa nagkasari-sari nga bahin it Pilipinas ag mangin sa guwa it nasyon particular sa gin-intrahan karang event sa Indonesia, China, Japan ag Thailand.
Samtang, nagaeaom man do pamilya it atleta nga mataw-an raya it award bilang pagpasidungog sa anang ginpakita nga kamayad sa sports bisan nga may edad eon at maging inspirasyon sa mga pamatan-on. // SHERRY ANNE REUNIR-VIDAL
