SUBLING miapela ang kapulisan sa mga motorista dungan sa pagsaka sa ihap sa namatay sa mga insidente sa bangga karong bulan.
Matud ni Police Col. Nicomedes Olaivar Jr., director sa GenSan City Police Office (GSCPO) sagad sa hinungdan sa bangga mao ang overspeeding o paspas nga pagpadagan sa sakyanan.
Nakita usab nga dunay insidente nga gawas sa overspeeding natimahoan nga naa sa impluwensiya sa ilimnong makabuhog ang drayber.
Giangkon ni Olaivar Jr., nga nabalaka siya sa sunod-sunod nga insidente nga gikahunos sa kinabuhi sa pipila ka mga residente sa siyudad.
Sa ulahing datus gikan sa GSCPO- Traffic Enforcement Unit (TEU) karong bulan sa Hunyo naa na sa 24 katao ang natala nga patay sa bangga.
Asa labing daghan mao ang insidente nakalabay’ng semana nga gikalambigitan sa traysikel ug trak nga gilayong gikamatay sa lima katao. I Richel Gubalani
