LEGAZPI CITY – Kapot na kan mga awtoridad an 2 Regional Most Wanted Person makalihis madakop an mga ini sa magkakasiblag na operation sa Bicol Region.
Enot na naarestar na si Alyas Ekay sa Brgy. Tabugon, Sta. Elena, Camarines Norte, sa pakikipagtabangan kan Paracale MPS, Sta. Elena MPS, CIDG Cam Norte asin 91st SAC PNP-SAF, na isirbi an warrant of arrest laban sa akusado.
Si “Ekay” nahahampang sa 2 kaso nin pagbalgar sa Section 5 kan RA 9165 o Comprehensive Dangerous Drugs Act of 2002 susog sa warrant of arrest na iniluwas kan RTC Branch 38, Daet, Camarines Norte kan nakaaging bulan nin Hunyo 26, 2024.
Si “Ekay” ay tinaguriang rank 6 Regional Most Wanted Person kan PRO5 asin sa presenting nasa kustodiya kan Paracale MPS para sa magkakanigong dokumentasyon.
Mientrastanto, dakop man an sarong 46-anyos na lalaki hale sa Bacon District, Sorsogon City, Sorsogon sa pinagsarong pwersa kan CIDG Sorsogon PFU, 92nd SAC 9th SAB PNP SAF, Sorsogon CPS, asin Sorsogon 1st PMFC.
Binisto an nadakop na si alyas “Oward,” nakarehistro bilang Regional Most Wanted kan Bicol asin nahahampang man sa 3 kaso nin Rape asin Lascivious Conduct under Section 5(b), Article III kan RA 7610.
