Wala pa mopagawas og pormal nga pamahayag ang kadagkuan sa kapolisan sa Region 7 kalabot sa duha ka mg police officers nga gilambigit sa pagpatay sa managtiayong didto sa Sitio Tapok-tapok Barangay Panadtaran, San Fernando Cebu niadtong Pebrero 13 niining tuiga.
Nasayran nga mitahan sa ilang kaugalingun sila Police Staff Sergeants Junrey Gillana Batobalunos, 42, og Junrey Papaya Ypil, 36 ug giangkun ni Ypil ang iyang kalambigitan sa pagpatay kang incumbent Panadtaran barangay councilor Ma. Louela “Malou” Baringui-an ug sa bana niini nga si Peter.
Samtang si Batobalunos, sa Lapu-Lapu City Police Office (LCPO) wala moangkun sa iyang kalambigitan sa kremin apan mitahan lang kini sa iyang kaugalingun aron matud pa paglimpyo sa iyang pangalan.
Alas 3 sa hapon sa Pebrero 20 niining tuiga, si Ypil nga molopyo sa Barangay Canamucan Compostela ug nadestino sa Danao Police Station mitahan ngadto sa Provincial Intelligence Unit of the Cebu Police Provincial Office (CPPO).
Si Ypil didto kini misurender sa Regional Intelligence Division chief Colonel Glenn Mayam ug PIU chief Lieutenant Colonel Roderick Gonzales ug pagkagabie sa samang adlaw, si Batobalunos mitahan usab sa iyang labaw sa LCPO City Intelligence Unit (CIU), Lieutenant Colonel Jul Muhammad Leones Jamiri.
Gitahan usab ni Batobalunos ang iyang KG9 submachine pistol nga adunay duha ka magazines ug 18 ka buhing bala niini apan human sa iyang pagsurrender niini, siya gipaubos sa pag aresto.
Sa sayo pa niadtong Pebrero 13 sa kasamtangan tuig ang managtiayon nga Baringui-an gipamusil patay sa giingung lima ka mga tawo diin ang mga responsabli sa kremin giingung midala usab sa gibanabana nga usa ka million ka pesos nga salapi ug mga alahas sa mga biktima.
Wala pa hinuon mopagawas ang kapolisan kung unsa gyud ang klaro nga motibo sa maong kremin.
