Patay ang isa ka amay matapos nakuryente samtang nagatsekyar sa ginapatindog nga balay sang iya anak sa Barangay Jaena Norte, Jamindan, Capiz takna alas 9:19 kagab-i sang Sabado, Enero 13.
Ginkilala ang biktima kay Ramon Lusanta, 52-anyos kag residente man sang nasambit nga lugar.
Sandig sa impormasyon nagikan sa Jamindan Municipal Police Station, nasapwan na lamang sang 26-anyos nga anak ang iya amay nga nagahigda kag wala na sang kabuhi malapit sa gina-construct nga balay.
Nagapati ang pamilya nga nakuryente ang biktima bangud sa wire nga nagalaylay.
Ginpadangat pa sa Military Hospital sa Camperalta ang biktima apang ini ang gindeklara sang doktor nga dead on arrival.
Sa karon, yara na ang bangkay sang biktima sa isa ka punerarya sa nasambit banwa.
Samtang, nasapwan naman nga wala na sang kabuhi ang isa ka soltero matapos nakuryente sa banwa sang Sigma.
Ginkilala ang biktima kay alyas Nonoy, 21-anyos, mamumugon kag residente sang Brgy. Balucuan sa nasambit nga banwa.
Sandig sa impormasyon nagikan sang Sigma Municipal Police Station, nasapwan ang biktima sang iya Tiyo nga nagahigda na kag wala na sang kabuhi sa likod nga porsyon sang Baraka.
Nakit-an sa kamot sang biktima ang wire nga konektado sa live wire.
Ginpadangat pa ini sa Sigma Rural Health Unit apang ini ang wala na matabangan pa.
Sa karon, yara na ang bangkay sang biktima sa isa ka punerarya sa nasambit banwa. | Judy Ann Juare
