Ginreklamo it daywa ka complainant sa Kalibo MPS ro daywa ka eaeaki ag sangka menor de edad matapos segun sanda nga eagson it mga raya samtang may bitbit nga kutsilyo ro sambilog sa tatlong suspek.
Ginkilaea ro mga suspek nga sanday Angelo Maribojo 18yo it Brgy. New Buswang, Kalibo, Christopher Ruda 18yo ag sangka menor de edad nga kaibahan nanda.
Sa report it daywa ka complainant, samtang nagahueat sanda it tricycle sa may Roxas Avenue Kalibo kaina it ala 1:30 it kaaganhun, gintawag segun sanda it tatlong suspek.
Ginpaeapitan segun nanda ro mga raya sa pagdumdom nga kakilaea nanda pero gumabot segun si Ruda it kutsilyo ngani insigida nga nagpangayo it pasensya ro sambilog sa complainant ag sumakay it tricycle pero gin-eagas segun it tatlo ngani nagdesisyon sanda nga magreport sa pulis.
Insigida man nga rumesponde ro mga kapulisan sa area ag nadakpan si Maribojo ag sangka menor de edad pero si Ruda hay nakapaeagyo.
Pag-abot sa Kalibo MPS hay ginkutana ro daywa kung ano ro sueod it bitbit nanda nga sako. Nagsabat ro sambilog nga kuring pero kat sipaon it pulis ro sako hay manok nga pangbueang gali ro sueod it mga suspek nga tinakaw nanda sa may Purok 2 C.Laserna St., Kalibo.
Nagpamalibad man nga kasuhan it mga complainant ro mga suspek ag ginbalik man ro tinakaw nanda nga manok. / ANN DESLENE SALAZAR
