Giimbargo sa kapulisan sa Bansalan ang mga motorsiklo sa 12 ka batan-on nga nadakpan human naglusad og drag race sa Brgy. Mabuhay, Sabado sa gabii, Hunyo 5, 2021 sa Quarry site sa Purok 3, Sitio Dalagit, Brgy. Dalumay Bansalan.
Una niini gisumbong sa mga residente ang pagpahigayon og drag race sa mga batan-on sa maong klugar hinungdan girespondihan dayon sa mga sakop sa 2nd Mobile Force Company sa pagpanguna ni Police Executive Master Sergeant Rems Roy Rosareal ug ilawom sa superbisyon ni Lieutenant Col. Roy Santillan ug deputized agent sa Land Transportation Office.
Naabtan sa otoridad ang kabatan-onan nga ang uban gikan pa sa silingang lungsod sa Matanao nga nag-race hinungdan gipanakop ug gipang-imbargo ang mga motorsiklo.
Gawas sa paglapas sa RA 4136 kun Land Transportation Code of the Philippines nakasupak usab ang mga nahisgutan sa minimum public health standard human wala nagsoot og face mask ug wala sab saktong dokumento ang kadaghanan sa mga motorisklo.
Ginatun-an pa sa kapulisan ang mga kaso nga ipasaka batok sa mag batan-on.BNFM-DAVAO
