Subling gipa-ubos sa modified enhanced community quarantine kun MECQ with heightened restrictions ang 11 ka mga local government units sa Probinsya sa Sugbo sugod karung adlawa tungod sa nagkataas nga kaso sa Covid-19.
Sa nahisgutang ihap walo niini ang mga lungsod ug lakip ang tulo ka mga component cities saa probinsya nga gilangkuban sa Consolacion, Liloan, Cordova, Minglanilla, Sibonga, Samboan, Argao, Oslob ug mga syudad sa Talisay, Naga ug Carcar.
Samtang ang nahabiling bahin sa probinsya, magpabilin ubos sa general community quarantine with heightened restrictions hangtud sa Agosto 15.
Sa executive order nga gipagawas kagabie, gidid-an na ni Cebu Governor Gwen Garcia ang operasyon sa non-essential establishments sa 11 ka mga dapit nga gipa-ubos sa MECQ sama sa karaoke bars, internet cafes, amusement parks, gyms, arcades, sport courts, casinos, outdoor tourist attractions, beauty salons, massage therapy ug uban pang personal care services.
Sa datus sa Department of Health-7, ang Probinsya sa Sugbo aduna nay 23,891 total cases sa Covid-19 human nadugangan ug 280 ka mga bag-ong kaso.
Sa kasamtangan ang probinsya adunay 4,487 ka aktibong kaso ug miabot na sa 18,350 ang mga naka-recover.
Adunay nadugang nga 25 ka mga namatay tungod sa komplikasyon nga dala sa Covid-19 hinungdan nga misaka na sa 1,054 ang total deaths sa Cebu Province.
