Pilason ang isa ka lalaki matapos nga bumunggo ang ginamaneho sini nga motorsiklo sa kasugata nga Van sa National Highway sang Barangay Poblacion, Jamindan, Capiz.
Ginkilala ang driver sang motorsiklo kay Hernane Januto 33-anyos, residente sang Barangay Jagnaya samtang ang driver sang van amo si Gemar Vipinosa, 32-anyos kag residente sang Barangay Bayebaye sa nasambit nga banwa.
Suno sa impormasyon nagikan sa Jamindan MPS, samtang ginasubay sang motorsiklo ni Januto ang dalan nagikan sa Barangay Esperanza padulong kun tani sa Barangay Poblacion, nakasugto hinali na lamang nga nadulaan sang kontrol sa manubela ang kasugata nga van nga ginamaneho ni Vipinosa.
Bangud sa natabo nag-angkon sang pilas sa nagkatuhay nga lawas si Januto kun sa diin madasig nga nagresponde ang Municipal Disaster Risk Reduction and Management Office (MDRRMO) kag gilayon nga ginpadangat sa Mambusao District Hospital.
Samtang, yara naman sa kustodiya sang Jamindan Municipal Police Station ang duha ka salakyan para sa nagakaigo nga disposisyon. | KMD Gicalde
