Usa patay, duha angol sa disgrasya nga nahitabo sa Klinan 6, Provincial Road, Polomolok, South Cotabato gabei sa adlaw nga Miyerkules.
Subay sa talaan sa Polomolok PNP ang disgrasya nahitabo sa Klinan 6 alas 8:45 sa gabei ug girespondihan ni Pmsg Garcia.
Ang mga sakyanan nga nalambigit sa disgrasya usa ka unit sa motorsiklo nga may temporaryong plate number gimanihoan ni Christopher Ecot Sr., 35-anyos ug may duha ka angkas nga silang Jenelyn Fernando, 30-anyos ug si Christopher Ecot Jr., 2-anyos, sila nagpuyo sa Purok Sagrado Valencia Site, Poblacion, Polomolok, South Cotabato.
Ang laing sakyanan mao ang Sadam nga gimanihoan ni Angelito Lantingan, 46-anyos, minyo nga taga Alkikan, Malungon, Sarangani Province.
Sumala kay Lantingan gikan sila sa Miasong may karga nga pinya padulong sa Dole apan pag-abot sa Klinan 6 may nag-overtake nga Hilux nga paspas ang padagan unya sa kalit lang may kusog nga lagubo sa likod.
Pagtan-aw ni Lantingan nabangga ang motor sa likod sa Sadam unya sa unahan may tawong nahagba, may bata nga angol mao nga gipaabot nalang daw niini ang pagrespondi sa pulis.
Sa record sa Polomolok PNP ang mga sakay sa motorsiklo nadala sa Polomolok Municipal Hospital apan gideklarang dead on arrival sa doctor ang bata.
Boluntaryo usab nga nitahan sa kapulisan ang driver sa Sadam human na diskarga ang mga pinya ug sumala niini nga sa 20-anyos niya nga pagmaniho karon palang siya nabanggaan unya may namatay, wala daw niya tuyoa ang nahitabo hinay man ang iyang padagan gumikan kargado og pinya. ( Ever Diazon)
