MGA gwardya na sa usa ka security agency ang nagabantay sa entrance nga bahin sa Purok 14 sakop sa Barangay Tinagacan human nga napalayas ang mga claimants sa yuta.
Sumala sa Team Leader nga si Jury Patriarca nga naa sila sa area kay ilang gisunod ang mando sa ilang agency ug ang ilang trabaho karon mao ang pagdepensa sa propedad, kon adunay mosulod ilaha una nga estoryahon apan kon mo ataki kanila manalipod usab sila sa ilang kaugalingon.
Wala usab nagpasagad ang taga Purok 11, sumala sa usa ka land owner nga si Roberto Labio, 72- anyos, wala usab siya nakatulog sa nahitabo ug padayon nga nagabantay.
Samtang nagpasalamat sa Ginoo ang usa ka ginang nga si Maria Luisa Carmona kay napahawa na ang mga claimants, na apektuhan daw ang seguridad sa ilang pagpuyo lakip sa ilang mga kabataan.
Sa impormasyon nga iyang nakuha gikan sa ubang claimants sa Purok 11, gipatuo daw sila nga may yuta nga ipanghatag sa mao nga lugar mao nga niadto sila ug nagtukod og payag.
Samtang gipaklaro ni Kapitan Jeoffrey Salanio nga ang mga land owners mao ang nangusog nga ipa demolish ang mga claimants ni uporta lang ang taga Barangay, LGU Gensan, kapulisan ug kasundalohan. I Ver Diazon
