KABANKALAN CITY, Philippines — Blangko ang anay miyembro sang ethics committee sang Negros Occidental Electric Cooperative, kun ano ang plano kag lihok sang naga-dumala sang kooperatiba para ma protektahan ang mga kunsomidor sa pag mahal sang kuryente.
Suno kay Irene Viason, isa ka kunsomidor kag anay ethics committee member sang kooperatiba, dapat gin tun-an sang bag-o nga administrasyon ang pagpangita sang power supplier antis nagsulod ang summer season, bangud gina-antisipar na ina nga may pagtaas sa kuryente sa sina nga tion, agud indi ma apektuhan ang ang mga kunsomidor.
Alegasyon ni Viason, nga ang anay mga board of directors kag administrasyon sang NOCECO ang una nag identify ang KEPCO Selcon, bilang isa ka power supplier nga may manubo nga presyo, apang, gina-alegar sang pag-pasa sang plano sa National Electrification Administration, gin pabuyan-buyanan ini kag wala na endorsed sa Energy Regulation Commission para sa approval.
Dugang pa ni Viason, bangud gin-kakas ang mga anay board of directors sini sang Pebrero, kag ang general manager nga si Ray Bustamante sang Abril, subong pa lang gin-giho sang mga panibag-o nga administrasyon ang kuntrata sa KEPCO, apang ulihi na ang tanan.
“Tungod kay ulihi na, namudyot nalang sila sa spot market sang supplier nga kabalo kita mataas na nga presyo.Wala ma consider ang mga members-consumers-owners (MCOs), kundi abagahon naton tanan ini,” pahayag ni Viason.*