Mipagawas na og opisyal nga pahayag si Vice President Sara Duterte kalabotan sa bag-ohay lamang nga pahayag ni First Lady Liza Araneta-Marcos nga “bad shot” na kini kaniya.
Kahinumdoman nga mipadayag sa iyang kahiubos si FL Liza Marcos ngadto kang VP Sara ug gikanayong “bad shot” na kini kaniya gumikan sa pagpahiyom sa ikaduhang pangulo samtang giingnan sa amahan nining si kanhi Pangulong Rodrigo Duetret nga ‘bangag’ si Pangulong Ferdinand “Bongbong” Marcos Jr.
Gibutyag ni VP Sara nga katungod sa First lady ang makabati og kahiubos o kasuko isip usa ka tao. Apan, bisan paman niini, wala kini kalabotan sa iyang pagka-opsiyal sa kagamhanan.
Gipamugos usab sa ikaduhang pangulo nga daghang angayan nga tutokang problema ang nasud ug ang maong hisgutanan, ila lamang kini ni PBBM ug ang mga musunod pang lakang.
Inay nga hatagan og pagtagad ang maong isyu, mas tutokan sumala pa ni VP Inday ang mga problema nga giatubang sa nasud sama sa padayon nga pagtaas sa presyo sa mga pagkaon ug uban pang palaliton, problema sa kakulangon sa supply sa tubig ug kuryente, samtang naghitak gihapon ang illegal nga droga.
Ang walay kahumanan nga bahad sa kriminalidad, terorismo ug insurhensiya sa nasud Pilipinas.BNFM-DAVAO
#InTheHeartOfChangingLives