Gibutyag ni Francis Cesar Bringas kinsa mao ang Assistant Secretary sa Department of Education nga motambong sa closing ceremony sa Palarong Pambansa 2024 si Vice President Sara Duterte. dugang pa ni Bringas nga anaa sab sa closing ceremony si Ilocos Governor Mat Manotoc kay ang Ilocos man maoy host sunod tuig sa Palarong Pambansa 2025. Sa umaabot closing ceremony ipahibawo pud sa Palarong Pambansa Board ang mo-host sa 2026 Mindanao edition sa Palarong Pambansa.
Kabahin sa seguridad sa pagtambong ni VP Sara karong Martes, matud ni Bringas nga ang protocol sa buhatan ni VP Sara maoy makig-alayon sa kapulisan dinhi sa dakbayan sa Sugbo.
Gilauman ni Asec Bringas nga susama ra kahigpit ang seguridad nga ipatuman sa closing ceremony sa seguridad sa opening ceremony hain si Presidente Ferdinand “Bongbong” Marcos Jr. maoy pinasidunggang mamumulong.
Nasayran nga ang Kagamhanan sa Probinsya sa Sugbo, pinaagi ni Gobernador Gwen Garcia midonar og P8 milyones nga maoy gamiton sa pagpahigayon sa closing ceremony
Gipahibawo sab ni ASec Bringas nga magpadayon ang mga schedule sa duwa sa Palaro bisan sa nasugatang kakulian sama dili maayong lakat sa panahon Gikakontento rasab si Asec Bringas sa iyang paglibot sa tanang mga sporting venues sa Palarong Pambansa dinhi sa dakbayan sa Sugbo ug sa kasikbit nga mga lugar sukad nagsugod ang mga duwa
Sa kinatibuk-an adunay 30 ka dapit nga gipahigayonan sa Palaro ug 20 ka mga eskuylahan nga gihimong billeting quarters
Samtang 89 nalang ang nalandig gihapon sa tambalanan ug padayong giatiman sa mga doctor sa Cebu City Medical Center.
Gibutyag sab ni John Pages, Chairman sa Cebu City Sports Commission nga moabot sa 600 ka medical teams ang nitabang, lakip mga espesyalista gikan pa sa Metro Manila, sa pag-atiman sa mga atleta
Samtang kabahin sa track oval nga matod pa kuwang og dos metros, niingon si Asec Bringas nga dunay third party nga maoy mosukod unya niiini pag-usab aron matan-aw kung kuwang ba gyud o sakto ra.//
