Nagreklamo sa Banga Police Station ro sangka mekaniko matapos segun nga ibaligya it auto shop nga anang dating ginatrabahuhan ro manual transmission it Toyota Hiace vehicle nga ginapaayos kana.
Ginkilaea ro complainant nga si Danilo Dalida Sr., 61yo ag residente it Brgy. Linabuan Sur, Banga Aklan.
Samtang ro anang ginareklamo nga nag chop-chop sa pilang kagamitan it saeakyan ag nagbaligya hay si Efren Bolante Jr., 40yo, native it Roxas City ag presenteng nagaistar sa Brgy. Libas, Banga ag tag-ana it sangka auto shop sa Brgy. Linabuan Sur, Banga Aklan.
Ro tag ana it saeakyan hay si Ambo Rentino 44yo it Poblacion Batan, Aklan.
Sa reklamo ni Dalida sa Banga PNP, nasayuran nana nga ginbaligya ni Bolante ro manual transmission it saeakyan sa dati nanda nga customer.
Insigida segun nga gintawagan ni Dalida si Bolante pero ginpamalibaran kara ro alegasyon ag indi eon segun makontak si Bolante.
Nadiskubrehan pa ni Dalida nga naduea man ro iba pang parte it nasambit nga saeakyan rasun nga ginpakamayad kara nga ipa-blotter sa pulis ro insidente.
Narekober man ro nasambit nga motor transmission ag sa kustodiya eon raya makarun it Banga PNP ag nagapadayun pa ro imbestigasyun. / ANN DESLENE SALAZAR
