Pilason ang isa ka lalaki matapos nga ginbuno sang suspek nga nag-utang sa iya Barangay, Inzo, Roxas City.
Ginkilala ang biktima kay Glenn Guanzon, 42-anyos, isa ka mekaniko kag residente sang Barangay Adlawan samtang ang ginatudlo nga suspek amo si Janjan Villaruz alyas ‘Janjan Ugat’ kag residente sang Barangay Banica, sining siyudad.
Base sa impormasyon. ginapahayag nga nagpatunga ang mainit nga indi pag-intindihanay matapos ginsukot ni Guanzon si Villaruz sang iya utang apang wala ang mga ini nagkasugot.
Ginapahayag nga hinali lang nag kuha sang matalom nga hinganiban ang suspek kag ginbuno ang duha ka kamot sang biktima.
Gilayon nga ginpadangat sang RCERT sa Roxas Memorial Provincial Hospital ang biktima para dapatan sang pagbulong samtang madasig naman nga nagpalagyo ang suspek matapos nahimo ang krimen. | KMD Gicalde
