GI-AMBUSH ang usa ka pamilya nga sakay sa sakyanan padulong unta sa panimalay nga ilang haranahon kaadlawon sa Hulyo 19 sa Sitio Datal Muling Kibala, Malungon, Sarangani Province.
Kaadlawon sa Hulyo 19 nanawag ang gwardiya sa Doctors Hospital ngadto sa kapulisan nga may gidala nga mag inahan nga biktima sa ambush.
Ang inahan may samad sa bukton samtang sa ulo usab ang samad sa batang babaye samtang walay samad ang amahan.
Subay sa impormasyon nga gihatag sa nagpailang Vivian, kabanay sa biktima ang gi-ambush silang Bonnie Penpillo, 46-anyos, negosyante, Ann Penpillo, 40-anyos, asawa ug Krystal Penpillo, 10-anyos nga nagpuyo sa Sitio Alcantara, Datal Tampal.
Dugang ni Vivian nga gipukaw lang sila ni Bonnie kay magpahatod sa tambalanan kay adunay samad ang iyang asawa ug anak.
Sa pasiuanang impormasyon kaadlawon sa Hulyo 19 padulong ang pamilya sa igsuon ni Bonnie sa Kibala nga nagsaulog sa iyang adlaw nga natawhan ug ilang haranahon unta kuyog ang ubang miyembro sa ilang simbahan apan pag-abot sa ilang sakyanan sa awa-aw nga lugar gi- ambush ang pamilya.
Ang resulta nabungkag ang tuo nga bahin sa salamin sa elf nga ilang gisakyan unya nabuslot ang salamin sa luyo nga bahin, ang elf kolor puti nga may plaka nga JCR-942.
Naabtan usab sa Brigada nga anaa na sa panimalay sa mga biktima ang ilang sakyanan samtang nag-imbestiga pa ang Malungon PNP sa nahitabo.
Nasayran usab sa Brigada gikan sa mga silingan sa pamilya nga ang ilang negosyo mao ang pagpangumpra og gulay sa ilang lugar sa Datal Tampal, Malungon, Sarangani Province apan wala sila nasayod kon may nakaaway ang pamilya. ( Ever Diazon)
