PAKYAS ang ubang transport group sa pag-apply og rota sa GenSan alang sa e-jeep gumikan sa managlahi nga rason bisan pa nga interesado sila sa pag-upgrade gikan sa tricycle ngadto na sa modern jeepneys.
Sa kumpermasyon sa pangulo sa pula nga cluster nga si Joshue Fernandez sa karon spare parts ang ilang negosyo sa Barangay Calumpang, inay nga mangutang og e-jeep unya mo-apply og rota sa Local Government Unit sa Gensan subay sa Local Public Transport Route Plan kon LPTRP.
Gipaklaro ni Fernandez nga wala pa sila naka-upgrade niining panahona apan ang ilang target mahuman lang ang election kon bag-o na ang Mayor mo-apply sila og rota kay basin wala na daw mobabag sa ilang aplikasyon.
Sa karon dili usa daw sila manghilabot sa rota, kay ang ilang rota sa Apopong adunay nauna usab nga naka-apply.
Sa bahin usab sa Gensan Alliance of Transport Cooperative sumala sa ilang chairperson nga si Ronie Labajo andam usab sila nga mag-e-jeep mao nga namugna og kooperatiba apan aduna na usab nauna sa ilang gusto nga rota mao nga nagpatabang na sa mayor ug gapaabot sila sa solusyon.
Sa bahin sa usa ka opisyal sa Metro Gensan Transport Cooperative nga nakauna sa e-jeep sumala ni Orly Sabelita nga ang rota ginarekomenda sa LGU ngadto sa LRFTB pabor sa naga-apply nga coop.
Gipasabot niini nga wala daw nagapanag-iya sa rota, abli daw kini sa tanan nga coop nga mo-apply, sa LPTRP nga gi-aprubahan sa konseho anaa sa 14 ang rota, dili usab daw mahimo kon magdoble ang mobyahe nga coop sa usa ka rota, kon may overlapping 25 percent lang ang ginatugot.
Gidugang ni Sabelita nga naghatag na og pagpasabot ang taga LTFRB ngadto kanila kabahin sa regulasyon sa rota.
Samtang sa karon aduna pa daw upat ka rota nga available, sama sa Minanga Buayan ug Katangawan route nga kinahanglan pa palambuon. I Ver Diazon
