Padayon ro pagbaskog it industriya it turismo sa Boracay Island.
Sa mabahoe nga numero it mga dayuhang turista ro nagabisita sa isla kapin pa makara kung siin mas nageuwag ro mga COVID-19 restrictions sa lugar.
Sa datos, ro isla hay nakarekord it 434 ka mga international tourist arrivals ku nagtaliwan nga Pebrero. Ro mga nasambitan nga biyahero hay naghalin sa Germany, United Kingdom, ag United States.
Pero bian ro isla hay nagbukas eun sa mga bisita halin sa ibang mga nasyun, uwa gihapon it mga chartered o direct flights sa Kalibo International Airport.
Base man sa Malay Municipal Tourism Office, mas maabong lokal nga turista ro nakapagbisita sa sikat nga tourist attraction nga nagaabot sa 80,095 arrivals. Kapin sa 353 overseas Filipino worker man ro nag-adto makarang season.
Base man sa mga stakeholders, ro mga nasambitan nga numero hay manaba, pero ginaasahan nanda nga mataas pa raya sa masunod nga mga adlaw./JIL B. LACSON
