Tiniyak ng lokal na pamahalaan ng Calamba City Laguna na patuloy silang maghahatid ng tulong para sa mga empleyado at operators ng mga private resort sa siyudad na apektado pa rin ng community quarantine restrictions.
Ayon kay Calamba City Mayor Justin Marc Chipeco, nagsasagawa na sila ng kaukulang hakbang upang pahintulutan ang mga private resorts partikular sa Barangay Pansol na maipagpatuloy nang muli kanilang operasyon.
Aniya, iniapela na nila ito sa COVID-19 Inter-Agency Task Force upang pahintulutan ang mga resort owners na muling makapag-operate.
Mababatid na isa ang sektor ng turismo sa lubhang naapektuhan ng COVID-19 pandemic sa lungsod kung saan apektado ang mga operasyon ng private resorts dahil sa maigting na general community quarantine.
Matatandaan na nitong Mayo ay umapela ang mga resort operators kay Mayor Chipeco at sa DOT upang pahintulutan na umano silang magbalik-operasyon ngunit hanggang ngayon hindi pa rin sila pinapayagan.
Sa ngayon, hinihintay pa rin ang desisyon ng pamahalaang lungsod at ng mga kaukulang ahensiya ng gobyerno kung kailan maaaring magbukas at magpatuloy ang operasyon ng mga private resorts sa naturang lungsod.
