Patay ang helper sa truck human nga nadisgrasya sa Binasbas Bridge sa Barangay Binasbas, Laak, Davao de Oro Lunes sa buntag.
Sa impormasyon gikan Kalinaw Southeastern Mindanao Region (SEMR), gipara sa 60th Infantry Battalion (60IB), 1001st Infantry Brigade, Philippine Army alang sa inspeksiyon ang truck nga gidudang nagkarga og illegal nga pinutol nga kahoy.
Inay nga muhunong, nipaturatoy hinoon sa pagpadagan ang truck nga maoy hinungdan sa pagkadisgrasya niini nga gikamatay sa helper nga nailang si Jay Redondo.
Sa pikas bahin, gisaway ni Arian Jane O. Ramos, presidente sa Kalinaw SEMR, ang padayon nga operasyon sa illegal logging sa Davao region.
Gipamugos ni Ramos ang kamahinungdanon sa hingpit nga pagwagtang sa illegal logging sa malungtarong kampanya sa pagpabiling insurgency-free sa mga probinisya.
Pipila na ka mga kanhi rebelde ang nagpahayag nga ang sama sa illegal logging usa sa nag-unang tinubdan sa CPP-NPA-NDFP, nga makapadayon sa ilang pagsabwag og kasamok.
Gidayeg sa Kalinaw SEMR ang kasundalohan sa pagseryoso niini sa ilang kampanya nga mao ang pagprotekta sa kinaiyahan ug ang pagpakgang sa illegal logging sa probinsiya.
