NAKADAWAT og ayuda ang mga transport cooperatives gikan sa Office of Transport Cooperative kon OTC alang sa ilang padayon nga pagpamasada ning panahon nga anaa pa ang pandemya nga subling nisaka ang mga kaso sa COVID-19 virus.
Sa social media gi-post sa president sa Public Transport Alliance of Gensan nga si Robert Cang ang ilang nakuha nga ayuda gikan sa OTC ug DOTR nga mokabat sa 250 boxes sa alcohol, facemask, faceshields ug disinfectants.
Sa bahin sa Metro Gensan Transport Cooperative nakadawat sila og 120 ka boxes, ang matag box adunay sulod nga usa ka galloon nga alcohol, tulo ka galloon nga disinfectants,100 ka facemask ug may lima ka faceshields.
Tungod niini daku ang pasalamat ni Sabelita sa OTC nga naghatag tabang kanila gumikan ang pagsunod sa health protocol nagadugang kini sa gastos sa mga coop sama sa Metro Gensan nga nakagasto og anaa sa kapin ug kulang P100,000 pesos.
Gidugang ni Sabelita nga dili pa tanan ang nakadawat kay dili usab dungan ang pag abot sa mga ayuda, samtang gikumperma usab ni Sabelita nga apektado gayod sila kon mo-irog sa mas taas ang restrictions gumikan sa alert level status sa Covid-19 kay sa karon anaa daw sa 30 porsyento sa mga sumasakay ang nawala.
Nagpasabot daw kini nga nagatuman ang mga tawo sa restrictions mao nga wala na kaayo nagagawas sa panimalay ug mosakay sa mga jeepneys. I Ver Diazon
