APEKTADO usab ang mga transport cooperative sa Gensan sa unsa man nga usbaw sa presyo sa gasolina og krudo gumikan luwas sa e-jeep aduna silay mga unit nga de gasolina nga nagabyahe sa ilang mga rota.
Sumala sa manager sa Metro Gensan Transport Cooperative nga si Orly Sabelita nga ang ilang ginahimo naga-monitor kanunay sa dagan sa presyo kay matag adlaw nga Martes man ang adlaw nga mopasaka sa presyo ang mga gasolinahan.
Tungod kay adunay pag usbaw nga P1.20 sa gasolina unya P1.05 sa krudo, adlaw nga Lunes palang ilaha na nga gi-full tank ang ilang mga unit nga de gasolina aron nga makadaginot, ang full tank nagalungtad sa tulo ka adlaw nga byahe, pasabot niini ginasulayan gayod nila kung unsaon sa pagdaginot.
May kalabotan sa sugyot nga usbaw sa taripa dugay na daw nila kini nga gipangayo apan wala pa na aprubahan, mao nga ilaha na lang ginapaabot ang dugang ayuda sa gobyerno sama sa Pantawid Pasada cards alang sa multicabs.
Gidugang ni Sabelita nga ang Pantawid Pasada cards makatabang kanila kon adunay usbaw sa presyo sa gasolina, dili usab daw nila gusto nga magsigi og pasaka sa kantidad sa plitihan gumikan mo epekto kini sa mga sumasakay nga wala pa gani naka bangon sa epekto sa pandemya.
Nagapaabot usab sila sa Libreng Sakay Phase 3 alang sa mga e-jeep nga aduna usab dakung ikatabang sa mga transport coops nga nagabayad og dakung loans sa bangko sa ilang modern jeepneys. I Ver Diazon
