LEGAZPI CITY – Nagpaluwas ki traffic re-routing advisory an lokal na gobyerno kan Legazpi asin Daraga para sa ikokondusir na athlete parade sa opening kan National Private Schools Athletic Association (PRISAA) Games 2024 saaga, Hulyo 21.
Isasarado kaya an an dakulang parte kan Rizal street asin tatapaan man an portion kan mga tinampo papalaog digdi huli ta ini an magigin ruta asin assembly area kan parada hale Peñaranda Park, patuo sa Rizal St. pasisiring diretso sa BU Main Campus, alagad wara nang makakalaog puon pa sana sa crossing pa binanuahan road asin sa crossing man kan pa bagtang road ampang kan BU College of education sa Daraga.
Durante kaini nagpagirumdom si Public Safety Office Daraga Public Information Officer Lorenzo Bañas sa mga motorsita asin publiko sa alternatibong ruta nganing makalaog sa banwaan hale sa syudad kan Legazpi kun sain pwedesir umagi sa airport road pasiring na sa magayon drive o bagtang road (vice versa).
Dugang pa niya, laoman man an magabat na bulos nin trapiko huli ta dakula an aktibidad na pagpartisiparan ki 10,000 na atleta, coaches asin saindang mga opisyal hale sa labi 400 na manlaen-laeng pribadong kolehiyo asin unibersidad sa 17 rehiyon sa Pilipinas.
Mientrastanto, mapuon an pagsarado kan tinampo saaga, ala-una nin hapon, an assembly time iyo an alas-dos asin piglalaoman na mapuon an parada alas-tres na nin hapon.
