NAKURATAN ang mga nangaligo sa mga beach resorts sa baybayon sa munisipyo sa Maasim, Sarangani Province human nakita nga nidagsa ang daghan kaayong mga isda alas kwatro sa kaadlawon Enero 7 sa kasamtangan nga tuig.
Naabtan sa Brigada News team nga nalingaw sa pagpanghakot og isda ang mga katawhan gikan sa baybay padulong sa highway ug sa ilang mga sakyanan.
Samtang ang naa sa sulod sa resort gihimo na nga bularan og isda ang ilang mga lamesa.
Napuno og isdang lupoy ang ilang mga sudlan, ang uban gipanghatag na lang sa gusto nga mangayo samtang ang uban gibaligya sa barato nga presyo.
Gi-ablihan usab sa management sa beach resort ang ilang entrance unya wala nay bayad aron nga mahurot ang mga isda ug dili mabaho na lang sa ilang lugar.
Sumala kay Hairan Pagabangan, usa ka inahan gikan sa Siguel, usa ka grasya gikan sa kahitas-an ang mga isdang lupoy, dili na sila mopalit g sud-an.
Sumala usab sa anak sa tag-iya sa resort nga si Abudyell Lawa nga nakuratan usab sila sa pagdagsang sa isdang lupoy nga sa ilang bana-bana anaa sa kapin ug kulang unom ka mga truck ang gidaghanon. I Ver Diazon
