Nagpanugyan ang pamunuan sang Traffic Management Unit sa publiko ukon mga indibidwal nga nagasakay sa motorsiklo nga magbakal na sang helmet samtang wala pa naumpisahan ang pagpatuman sang “No helmet, No Driving” Ordinance.
Sa interview sang Brigada News FM Roxas City kay Bucth “Buchoy” Andrada, tagpamaba sang Traffic Management Unit, iya ginpahayag nga indi na paghulaton sang mga pumuluyo nga ipatuman ang ordinansa antes magbakal sang helmet.
Mahibaluan nga sadtong Hunyo 6, 2023, gin-aprubahan sang Sangguniang Panlungsod ang “An ordinance mandating all Motorcycle Riders to wear standard protective motorcycle helmet while driving within the territorial jurisdiction of Roxas City, Capiz ukon “No Helmet, No Driving ordinance of Roxas City”.
Kadungan sini, naghatag man sang 36 diyas ang Sangguniang Panlungsod agud makapreparar kag makabakal sang helmet ang mga motorista.
Mahimo naman pagamultahan ang sin-o man nga magabayolar sa tion nga iga-implementar na ang nasambit nga ordinansa.
Yari ang mangin penalidad sa sin-o man nga magalapas sa amo nga ordinansa;
1st offense -P500
2nd offense-P1,000
3rd offense -P3,000
4th and subsequent -P5,000. Samtang, otorisado naman ang Traffic Management Unit (TMU) Roxas City PNP kag City Ordinances and Regulations Enforcement (CORE) Unit sa pagpangdakop sa sin-on man nga magalapas. | Judy Ann Juare
