Patay ang isa ka tiyo matapos ginbuno sang iya hinablos sa Brgy. San Esteban, Pilar, Capiz takna alas 4:50PM kahapon sang Huwebes, Mayo 30.
Ginkilala ang biktima kay Rolando Perez, 66-anyos, isa ka tanod. Samtang ang ginatudlo suspek amo si Renato Bellosillo, 22-anyos, mamumugon, lunsay mga residente sang nasambit nga lugar.
Sandig sa imbestigasyon sang Pilar Municipal Police Station, gingubat sang biktima ang suspek sa puluy-an sini kag nagluntad ang pagbinaisay.
Ginapahayag nga ginlampusan sang biktima ang suspek sang butong kag naigo ini sa agtang.
Bangud sa natabo, madasig nga nagkuha sang kutsilyo ang suspek kag gindusak ang iya tiyo rason nga nag-angkon ini sang pilas sa nawala nga porsyon sang tyan.
Gindala ang biktima sa ospital apang gindeklarar sang doktor nga patay na.
Natigayon naman nga maaresto ang suspek lakip ang kutsilyo nga gingamit sini sa pagpangbuno. | Judy Ann Juare
