KALIBO, AKLAN—Dakop sa akto nga nagahampang it tong-its sa sangka game farm do tatlong katawo sa Sitio Talipapa, Barangay Pook, Kalibo, Aklan.
Ginkilaea do mga raya nga sanday Jacquiline Villar, 52 anyos, Josie dela Cruz, 50 anyos ag Orlando Pastrana, 75 anyos tanan residente it nasambit nga lugar.
Base sa report, nagapatigayon it intel monitoring do mga miyembro it Kalibo MPS kat maaktuhan nga nagapatigayon it illegal gambling do mga nadakpan kung siin nabuoe sa andang possession do sangka set it baraha, kwarta nga ginapatihan pusta nga nagaabot sa Php 406.00, kahoy nga lamesa ag tatlong plastic nga bangko.
Sa makarun, do mga nadakpan hay presenteng nakakulong sa Kalibo PNP ag nakataeanang pasakaan it kasong pag-eapas sa Presidential Decree 1602 o Illegal Gambling Law. // SHERRY ANNE REUNIR-VIDAL
