DAKO ang kalipay sa taga Sports Division sa General Santos City sa kadaugan sa boksidor nga nagdala sa address nga Gensan nga nakaputol sa kawalay titulo sa mga boksidor sa Pilipinas sa natad sa boxing human napildi ang mga kampeon.
Sa pahayag sa usa ka personahe karon sa Sports Division nga si Sonnie Sombrio sumala niini nga si Dave Mark Apolinario natawo sa Maasim, Sarangani Province ug sa dihang nisulod sa boxing ginadala niini ang pangalan sa Sarangani apan sa karon anaa siya sa Boxing Promotions nga Sanman nga taga Gensan mao nga Gensan ang iyang address.
Tungod niini ginatimbaya sa taga sports division si Apolinario ug sumala kay Sombrio nga ilang tan-awon ang proseso sa mga claims sa cash incentives alang sa mga magdudula nga makasungkit og international nga titulo aron masuklian usab ang kahago sa atleta ug ang dungog nga ginahatag niini sa lugar.
Kahibaluan nga sa miaging Hulyo 29 nasungkit ni Apolinario ang IBO World Flyweight Title human gipalukapa sa unang round ang kaatbang nga si Gideon Buthelezi sa away nga gipahigayon sa South Africa. I Ver Diazon
