NAGHATAG pagpaklaro ang management sa pension house kung asa gidakop ang usa ka babaye ug lalaki.
Hulyo 27 sa buntag gi-adtuan sa Brigada patrollers ang Zia pension house ug naa mismo ang tag-iya niini nga si Arlyn Timplado, anaa usab ang iyang mga staff nga naghatag dugang pagpaklaro sa nahitabo.
Sumala kay Timplado nga nakuratan usab sila nga adunay pulis nga niabot sa ilang pension house ug ulahi na sila nakabalita nga aduna diay gisundan nga asawa ug kuyog nga lalaki.
Sa ilang bahin dili sila makahibalo kon magtiayon o dili ang mosulod,ang ilaha lang ginasiguro nga dili minor ang mag check in.
Samtang sa kumpermasyon sa usa ka staff nga nagpaila sa pangalang Bebe, 12:30 sa udto nisulod ang duha unya takdang mag-check out alas 12 pod sa gabei, sa iyaha lang nasayran nga nikaun pa ang duha human nga nag-check in unya sa dihang naa na ang pulis sila ang nanuktok unya nakita daw niini nga ang lalaki maoy nangabli sa pultahan, samtang nanago sa luyo sa pultahan ang babaye, nakita usab daw niini nga nakasab-it sa bintana ang sanina sa lalaki.
Samtang sa bahin ni alias Shiela nahinabi kini sa Brigada samtang naa siya sa sulod sa selda sa presento 7, sumala niini nga tinuod nga nasakpan sila,ug nakahibalo daw siya nga mali ang iyang gihimo apan aduna usab dakong mali ang iyang bana.
Gipahayag niini nga dili maayo ang ilang relasyon sa iyang bana sa dihang naa pa sila sa Bukidnon hangtud nga nanarbaho siya sa usa ka canning sa Gensan, aduna daw silay anak nga 9-anyos.
Ang iyang problema sa iyang bana kay palahubog unya nagapamuyboy daw kon mahubog mao nga napugos siya sa pagpanarbaho, nagapang- harrass daw ang iyang bana kon mahubog mao nga nipalayo siya apan nanghulga ang iyang bana nga kuhaon ang ilang anak mao nga subli sila nga nagakauban apan dili maayo ang relasyon.
Gidugang ni Shiela nga nakarelasyon niya ang usa ka katrabaho nga bulag usab sa asawa nga si alias Ryan 28-anyos ug unang adto pa nila sa pension house sa dihang gipasakop sa iyang bana, iyaha na lang usab atubangon kon usnay sunod nga mahitabo. I Ver Diazon
