-Reymund Titong
NEGROS OCCIDENTAL, Philippines — Sa 32 tanan ka mga local government unit (LGU) sa probinsya sang Negros Occidental, ang syudad sang Himamaylan ang nangin pilot city sa pag-gamit sang electronic Business One-Stop Shop (eBOSS).
Ang eBOSS ang isa ka online portal nga pwede magamit sang mga kliyente sang syudad agud magkuha sang ila business permits ukon sa sa pag-rehistro man sang ila mga negosyo, nga may tinutuyo nga mapahapos kag mangin masulhay ang mga transaksyunes sa gobyerno.
Pahayag ni Department of Interior and Local Government (DILG) Provincial Director Teodora Sumagaysay sa ginhiwat nga commendation ceremony sang ARTA sang Martes, Hunyo 25 sa Himamayalan, ang nasambit nga syudad ang una nga naka comply sa mga rekitos sang Anti-Red Tape Authority (ARTA) , kag ini ang suno sa iya ang maka ganyat sang mga negosyante nga magsulod sa syudad, bangud sa mahapos kag madasig ang proseso sa pagkuwa sang business permits.
Sa piyak nga bahin, para kay Himamaylan City Mayor Rogelio Raymundo Tongson, bugal sang syudad nga maka-ubra sang programa nga makahatag sang dako nga impact sa mga pumuluyo kag nagapamatuod nga dako ang kapabilidad sang syudad sa paghatag sang nagkalain-lain nga serbisyo.
Ang eBOSS ang isa lang sa mga inisyatibo sang Anti-Red Tape Authority (ARTA) kaupod sang mga ahensya sang gobyerno, sa idalum sang Republic Act 11032, ukon ang Ease of Doing Business (EODB) Law.
Nagalaum man si Tongson nga ang iban pa nga programa sang gobyerno ang masuportahan sang mga pumuluyo, upod ang iban pa gid nga ahensya sang gobyerno.*
