-Reymund Titong
KABANKALAN CITY, Negros Occidental — Pilason ang apat tanan ka persona matapos magluntad ang aksidente sa Barangay Calling, banwa sang Cauayan, pasado ala-1 sang udto, adlaw sang Martes, Hunyo 25.
Sa Interview sang Brigada News FM-Kabankalan kay Cauayan chief of Police Major Gary Alan Resuma, iya ginpahayag nga imbolbado diri ang isa ka dumptruck nga ginagamit sa quarry kag isa ka tricycle nga may karga nga duwa ka pasahero.
Suno sa ila imbestigasyon, naghalin ang dumptruck sa Barangay Inayawan sa nasambit nga banwa kag padulong na ini kuntani sa syudad sa Bacolod, apang sang naglab-ot ini sa dulhogon kag kurbada nga lugar, unhan sang sikat nga ruins sang Parola, gina-alegar nadulaan ini sang preno rason nga nagdiritso ini kag nabungguan ang nagapadulong nga tricycle, antis ini nahulog sa pil-as.
Ginkilala ang driver sang dumptruck kay Francis Oyos, 54-anyos , residente sang Pasay City, kag pahinante sini nga si Bernard Bohos, nga taga syudad naman sang Bacolod. Ang mga sakay sang tricycle ang ginkilala naman kay Paolo Limaco, Arnel Belnas nga mga lunsay residente sang Purok Talangnan, Barangay Tuyom kag ang driver naman sini nga si Roger Catacata nga residente sang Barangay Masaling.
Yara na sa estable nga kondisyon ang tatlo tanan ka mga persona nga gindala sa Isio Hospital, nga ginalakipan sang pasahero, driver sang tricycle kag pahinante sang truck. Samtang, naka-agum naman sang minor nga kapilasan ang driver sang truck, pahayag ni Resuma.
Sa karun, nakahunong sa Cauayan Custodial Facility ang driver sang ang dumptruck para sa naga-kaigo nga disposisyon, samtang gina-asikaso ang pagistoryahanay sang matimbang nga bahin.*
