Padayon nga gisubay karon sa Abellana Police ang motibo sa pagpusil-patay sa usa ka babaye sa Sitio Lower Kawayan, Brgy. Sambag 2 ning dakbayan sa Sugbo nahitabo alas 12:04 Dominggo sa kaadlawon, Hulyo 14, 2024.
Giila ang biktima nga si Jessica Sumbala, 37-anyos, dunay mga samad pinusilan sa iyang buko-buko, tiyan ug kilid. Dunay mga anak og residente sa maong lugar.
Nakakuha og kopya sa CCTV camera ang kapulisan sa maong panghitabo apan dili makita ang panagway sa suspetsado hinungdan nga naglisud ang kapulisan sa pag-ila niini.
Sa imbistigasyon sa Abellana Police Station, nasuta nga ang suspetsado nagsul-ob og itom nga jacket nga dunay hood. Human sa pagpamusil dali kining misibat.
Sigun ni Captain Mark Eric Papong ang Officer-In-Charge sa Abellana Police Station, base sa migawas sa ilang imbestigasyon, ang biktima giingong kanhi drug surrenderer niadtong 2018 ug nagpautang kini og kwarta sa dapit.
Subayon sab sa kapulisan kon mibalik ba sa pagkalambigit sa iligal nga druga ang biktima ug adunay posibleng gikaaway.
Nagsaulog pa sa iyang adlaw nga natawhan ang biktima niadtong Sabado sa gabii ug nag-inom uban sa mga higala sa naasoy’ng lugar. Apan sa pagpauli sa biktima padung sa ilang balay gidudahan nga giatangan kini sa nagbinugtong nga suspetsado ug dayon pusil kaniya sa makadaghang higayon. Posibling misuway kini og dagan ang biktima sulod sa silingan gumikan kay sirado ang pultahan didto na kini nabugto-an sa kinabuhi.
Narekober sa crime scene ang pipila ka kabhang sa bala og gitino pa sa mga sakop sa SOCO nga kalibre.
Basi sa pamahayag sa mga saksi, ang biktima nga si Jessica, usa ka aktibo nga Secretary sa Kapilya ni San Pedro Calungsod sa ilang dapit ug membro usab sa Urban Poor.
Subay sa hitabo, Ilegal nga Drugas ug personal ang padayong gisubay karon sa Abellana Police ngaposibling motibo sa pagpusil–patay sa biktima.//
