Sikop sa gipahigayong hot pursuit operation sa mga personahe sa Iligan City Police Office inubanan sa Highway patrol group ang usa ka suspek sa pagpangarnap og motorsiklo diha sa Zone 8, Brgy. Del Carmen, Iligan City.
Giila sa kapolisan ang dinakpan nga si Joshua Delmo y Dumaog, 23 adunay kapuyo, residente sa Purok 7 Tambo, Brgy. Hinaplanon sa nahisgutang siyuda.
Subay sa report sa kapolisan usa ka biktima nga nailang si Ronald Encarnado, 38-anyos, minyo, usa technician residente sa maong dapit, ang midangop sa buhatan sa kapolisan arun itaho ang pagkawagtang sa iyang motorsiklo ingonman ang salaping cash nga nagkantidad sa 15-mil pesos.
Tungod niini, gilayong milusad og operasyon ang mga otoridad nga miresulta sa pagkasapon sa suspek diha sa San Miguel Village, Pala-o, Iligan City.
Narekober gikan sa suspek ang smash nga motorsiklo nga gipanag-iyahan sa biktima.
Tingkagol na sa nasampit nga buhatan ang suspek samtang gihan-ay na ang kasong ipasang-at batuk niini.
