Gin-insister segun it suspek nga si Mark Archie Torrefiel nga panakaw eamang ro tinutuyo kara sa RD pawnshop ag owa ginhungod ro pagpatay sa biktimang pawnshop manager nga si Bonna Hercia Ambay.
Raya ro ginhayag sa media ni Kalibo Mayor-elect Juris Bautista Sucro kat makaistorya kara it personal ro suspek.
Base sa ginhambae it suspek kay incoming Mayor Sucro, ginprenda kara ro anang motorsiklo para ikapital sa lucky 9 pero kat mapierdi hay ginasukot eon imaw ngani naisip kara nga manakaw.
Ginhayag pa ni Sucro nga nakaplano ro pagaubrahon nga robbery it suspek bangud nagbakae pa segun raya it kutsilyo para may gamiton nga panghadlok.
Inako man segun it suspek nga nabun-an kara ro biktima bangud nagasininggit matapos imaw maghambae nga kwarta eang ro anang kinhangean.
Nagpanic segun ro biktima ag naga sininggit ag plano pang pinduton ro alarm button nga konektado sa police station ngani nagpanic man segun ro suspek ag indi eon nana matandaan kung pilang beses kara ginbuno si Ambay.
Matandaan nga nag angkon it 18 ka pagbuno sa eawas ro biktima base sa resulta it autopsy. / ANN DESLENE SALAZAR
