Nagtao it pahayag ku Biernes it hapon sa media si Kalibo Mayor-elect Juris Sucro kaangot sa pagkadakop kay Mark Archie Torrefiel ro security guard nga ginaturo nga suspek sa brutal nga pagpatay kay Bonna Hercia Ambay, ro pawnshop manager.
Ro suspek hay nag abot ku Biernes bandang alas 5 it hapon sa Kalibo International Airport (KIA) ag ginderetso sa Kalibo MPS ag gin-inquest ku Sabado para sa kaso karang Robbery with Homicide.
Nasayuran nga si Sucro hay insigida nga nagtao it reward money matapos kara nga masayuran ro Ambay slay case nga natabo ku dominggo it hapon, Hunyo 5, ag personal pa imaw nga nag agto sa Metro Manila kat nasayuran nga nadakpan eon ro suspek nga nagpadueong it Manila matapos maubra kara ro kremin.
Ginhayag ni Sucro nga kat makaatubang nana ro suspek sa camp crame hay ginkutana nana raya kung ham-an nahimo ro nasambit nga kremin.
Maeuha-euha segun nga nagsabat ro suspek nga owa kara ginahungod ro pagpatay sa biktima ag ro tinutuyo eang kara hay robbery o magpanakaw. / ANN DESLENE SALAZAR
