Nagapanakit matod pa kung mahubog ang suspek nga gitudlong midunggab patay sa iyang kaipon sa Purok 10, Brgy. Tacunan, Tugbok District Davao City pasado alas syete ang takna sa gabie sa miaging Domingo Hunyo 2 ning tuiga.
Sumala ni Edwin Salaysay, Bayaw sa biktima nga nailang si Emilia Fuentes Abo-abo, 55 anyos nga maoy matod pa kung mahubog ang suspek nga si Sergio Pornolles Xavier, diin sa milabay’ng bulan nagkalalis matod pa ang duha dihang nangayo ang suspek og tubig sa biktima, nasuko kini ug dihang gitunol ang baso kalit lang matod gilabay og baso ang biktima sa iyang nawong.
Kahinumduman nga ayha ang krimen dungan pa nga nakig-inum ang maglive-in partner sa ilang mga higala sa usa ka construction site sa Mintal ug niuli bandang alas singko sa hapon.
Sa pagpanubay sa Brigada, gisaysay sa silingan nga si alyas Botchok nga pasado alas 7:00 sa gabii sa susamang adlaw nadunggan nalang nila nga nagkalalis matod pa ang duruha ug wala nila kini panumbalinga gumikan nagkalalis na kaniadto ang mga nahisgutan unya nagkauliay.
Nakurat nalang matod sila dihang misyagit na ang biktima ug tabang sa makadaghang higayon hinungdan nga ila kining gisusi kung unsay nahitabo. Wala madugay nakita nalang matod niini ang suspek nga paspas milakaw palayo sa ilang gi-abangan nga balay.
Nagtuo ang mga silingan nga nahagbong lang sa hagdanan ang biktima nga nagkadugo apan wala madugay ilang nasayran nga puno og daghang dinunggaban sa lawas ang biktima.
Kasamtangang gihaya karon sa Angel Funeral Home Calinan ang patay’ng lawas sa biktima.
Samtang hustisya gihapon ang singgit sa pamilya nga madakpan na ang suspek.