NAKALUSOT na sa ikatulo nga pagbasa sa Sangguniang Panlungsod ang sugyot balaudnon nga nagabawal sa paglabay sa COVID-19 related waste sama sa facemask, faceshield, protective gears and products.
Sa kumpermasyon sa author nga si Kagawad Lourdes Casabuena walay nisupak sa mga miyembro sa konseho ug diritso nga na-aprubahan ang sugyot balaudnon, tungod niini nagapasalamat usab siya sa iyang kaubanan nga nakita usab ang panginahanglan sa mao nga balaud sa kasamtangan nga sitwasyon nga anaa sa pandmeya gumikan sa COVID-19 virus.
Sumala kay Casabuena nga kabahin sa unod sa ordinansa nga tanang COVID-19 related materials ginakonsidera nga potentially infectiuos ug contaminated bisan asa pa kini gikan, sama sa facemask, faceshield, dapat malahi ang butanganan niini.
Ibutang sa yellow plastic box o bins ug lakip sa mosunod niini ang tanang establisemento sa syudad, lakip nga tambalanan.
Wala usab nausab ang penalty clause nga na-aprubahan sa ang-ang sa komitiba nga si kinsa man nga masakpan nga nagalabay sa facemask, faceshield ug gears makamulta og P500 pesos.
Subay usab sa proseso sa ordinance moagi pa sa pagtugot sa Mayor unya ang publication bag-o mahimong epektibo. ( Ver Diazon)
