Gianunsyo sa sa City Transport and Traffic Management Office (CTTMO) nga nag-isyu og special permit ang Land Transportation Franchising and Regulatory Board (LTFRB) alang sa dugang mga bus nga magdagan panahon sa peak hours.
Kini aron nga sayon na lamang sa mga pasahero nga dagsa sa mga lugar duol sa unibersidad panahon sa peak hours.
Una na nga nakigtagbo si CTTMO Head Dionisio Abude sa LTFRB ug sa management sa Bachelor Express Inc. alang sa deployment sa mga bus aron matubag ang pagdagsa sa mga pasahero sa Matina Crossing, panahon sa buntag ug UM Bolton ug UM Matina sa hapon.
Dugang pa ni Abude nga mipasalig sab ang Bachelor nga mudeploy og mga bus, gani giaprubahan na ang ilang special permit.
Kasamtangan, dunay byahe ang Bachelor kung peak hours sa buntag gikan sa Bangkal NHA, duna say muagi sa Ecoland ug Bankerohan, mamahimong hapitan ang mga pasahero nga gikan Crossing Matina.
Panahon sa peak hours sa hapon paingon na sa gabii, duna say bus nga muagi sa UM Bolton muagi sa UM Matina padulong Mintal, Calinan ug Toril.
Dunay say muagi nga bus sa Bankerohan nga mamahimong mahapitan ang mga pasahero gikan sa Matina Crossing.
Base sa nasabotan, dunay duha hangtod lima ka unit ka mga bus sa buntag ug duha hangtod sa unom sa hapon. Andam nga dugangan sa Bachelor ugaling kulang pa ang mga nagdagan nga bus sa nasangpit nga mga lugar.
Matud ni Abude, ang augmentation magdepende sa pagmonitor sa mga traffic enforcer ug ang mga inspektor motambag usab sa bus company nga magdugang og mga bus, ilabi na kung mag-uwan.
Dugang pa sa opisyal nga kini nga mga rota ug mga bus makadugang sa kasamtangang bus augmentation sa peak hours alang sa mga pasahero nga paingon sa Panacan, nga anaa ang Golden Valley; Toril, kinsa giatiman sa LCI; Sto Niño, Mintal, Catalunan Pequeno ug Mintal Proper nga giatiman sa Metro Shuttle.
