LEGAZPI CITY – Sa karsel an bagsak kan sarong soltero makalihis ining arestaron kan mga otoridad huli sa pagpapabakal ki hinabonan na cellphone sa sarong mall sa Brgy. Capantawan, syudad nin Legazpi
Binisto ining si alyas “Alver”, 22 anyos na residente nin Purok 5, Brgy. 28, Victory Village, mantang an biktima iyo si Aibie Armario Juanitas, 23 anyos, college graduate, social worker, asin residente kan Purok 8, Brgy.Taysan.
Segun sa report, nahiling kan katrabaho kan biktima an nawawarang cellphone na naka-post sa Facebook Marketplace, kaya tulos man ining nagpresentar na maging buyer asin bakalon ini.
Huli ta enot nang nai-report sa pulisya an nawawarang cellphone, tulos na nagsagibo nin entrapment operation an mga intelligence operatives sa lugar asin kan magkaabotan na nin item, saka inarestar an suspek.
Sa ngunyan, nasa hepatura na ini kan pulisya para sa magkakanigong disposisyon mantang pinagprepaparar an kasong pagbalgar sa Anti-Fencing Law of Presidential Decree No. 1612.
