GINA-FOLLOW up karon sa mga backyard hog raiser sa Purok San Lorenzo, Brgy.Apopong ang gisaad nga P100-K nga ayudad sa mga magbababoy nga naapektohan sa African Swine Fever o ASF.
Segun ni Ivan Valencia, hog raiser sa Purok San Lorenzo nga sukad niadtong Enero 25, 2022 human magpositibo ang pipila ka baboy sa ilang purok sa ASF, nakadawat na sila og P1,000 nga ayuda gikan sa Brgy.Apopong ug P5,000 gikan sa CSWDO.
Samtang ginahulat ang gisaad kanila ni Mayor Lorelie Pacquiao nga P100-K mao nga miduol sila kang Kapitan Paolo Natividad ug gi-schedule na sila makigkita sa mayor sa city hall.
Sa pikas bahin, dili uyon si Valencia sa sogyot nga walaon ang backyard hog raising, tungod panginabuhian kini gawas pa nga mas angayang pangitaan og solusyon ug dili matud pa patyon ang backyard hog raising.
Samtang natingala kini nganong ang ilang lugar lang matud pa sa Purok San Lorenzo nga murag dili na pabalikon sa pagbuhi og baboy ug nganong ang mga ubang purok sa Apopong, nagapadayun man sa pagbuhi og baboy.
Hangyo usab ni Valencia sa taga City Veterinary Office nga dili sila limdan sa unsa mang kamatuoran sama na lang sa pagpakita sa resulta sa blood sampling.
Nasayran nga subling gihatagan og laing tulo ka bulan hangtud Setyembre 9, 2022 ang mga backyard hog raiser sa Purok San Lorenzo, human usa ka tangkal sa baboy ang gi-swab test ug nagpositibo sa ASF niadtong June 29 bisan wala na sila nagbuhi og baboy.
