KALIBO, AKLAN — Nagapabilin nga normal ro sitwasyun sa Medalla Milagrosa Cemetery ag Roman Catholic Cemetery iya sa banwa it Kalibo.
Sa interview it Brigada News FM Kalibo kay Mr. Norberto Clarite, security officer sa nasambit nga sementeryo, may mga nagaagto eon agud magpanglimpyo sa mga pantyon ag bumisita.
Nasayuran nga may mga naka-install nga CCTV sa Medalla Milagrosa Cemetery para ma-monitor ro mga magasueod ag magaguwa nga mga tawo.
Umapela man si Clarite sa mga tawo nga indi magdaea it mga kutsilyo ag aeak sa pagbisita sa sementeryo.
Naghinyo man raya nga maging responsable sa paglimpyo ag pagpilak it tagsa ka mga basura.
Samtang, ginklaro ni Clarite nga owa it gin-eubong nga namatay bangud sa covid-19 sa nasambit nga sementeryo.
Nasayuran nga base sa Executive Order it LGU Kalibo, temporaryo nga igapasara ro mga sementeryo iya sa Kalibo umpisa Oktubre 29 hasta Nobyembre 2, 2021. / ANN DESLENE SALAZAR
