BICOL—Makalihis an haros walong bulan, liwat na nagliwanag an pagkabanggi sa Sitio Anonang, Barangay Homapon, syudad nin Legazpi.
Ini makalihis na maibalik na an suplay nin kuryente sa nasambit na lugar kan makabayad na an Barangay Power Association (BAPA) kaini kan pighahagad na 70% kan kabilugan kan saindang moroso.
Disyembre 15, 2020 kan putulan nin power supply an BAPA sa lugar makalihis na magparalobo an utang kaini sa Albay Power and Energy Corporation (APEC) na uminabot sa P834,245.98.
Alas 5:00 nin hapon kan Lunes kan ma-energize an linya pasiring sa nasabing Sitio. Kan Sabado, Agosto 7 kan magbayad an BAPA nin nasa P580,552.00 bilang partial payment sa kabilugan kan utang.
Katakod kaini, nagsagibo nin line assessment an technical team kan APEC bilang parte kan preparasyon sa pag- reactivate kan duwang mother meters kan BAPA Anonang.
Marurumduman na antes kaini, sarong kongresista an duminulok sa DSWD ngani na matabangan an nasa 171 residente kan Sitio Anonang na mabayadan an moroso sa kuryente.
Mientrastanto, sinabi kan APEC na nasa proseso na sinda kan pagbakal asin pag instalar nin mga poste, service drop wires asin kilo watt hour meters para sa kahagadan na maidirekta an koneksyon kan nasabing Sitio sa linya kan APEC.
Ini kaya an napagkaolayan oras na mabayadan kan BAPA Anonang an 70% kan saindang utang sa electric bill.###
