Nasapwan nga wala na sang kabuhi kag may pilas sa ulo ang isa ka senior citizen takna alas 6:40 sang aga, Biyernes nga adlaw sa Barangay Taft, Tapaz, Capiz.
Ginkilala ang biktima kay Sergio Robiso, 63-anyos, residente sang Brgy. Malitbog sang nasambit nga banwa.
Sandig sa impormasyon nagikan sa Tapaz Municipal Police Station, nagpanawag sa ila istasyon si Barangay Kagawad Agustin Plaza agud ipahibalo nga may yara sang nasapwan nga bangkay sa higad sang karsada.
Madasig naman ini nga ginrespondehan sang mga kapulisan kag didto nakit-an ang biktima nga may mga pilas sa ulo nga gintunaan sang iya kamatayon.
Blangko pa sa karun ang mga kapulisan kun sin-o ang suspek nga may kahimuan sa krimen. Sa karon, padayon pa ang imbestigasyon sang Tapaz PNP sa nasambit nga insidente. | Judy Ann Juare
