Nag angkon it nina sa tuo nga abaga ag waea nga pa-a ro sangka lolo matapos rayang mabun-an kabii sa may Sitio Looban Libtong, Brgy. Estancia, Kalibo, Aklan.
Ginkilaea ro biktimang si Florencio Bitos 72yo, native it Maasin, Leyte ag presenteng nagaistar sa nasambit nga lugar.
Sa report sa Kalibo MPS, bago ro pagpamuno hay may natabo nga komosyon nga maeapit eang sa baeay it biktima kung siin, imbolbado kara ro suspek nga si Felipe Fernandez 54yo ag residente sa nasambit nga lugar.
Gin-eagas segun it suspek nga armado it bolo ro anang mga nakaaway sa nasambit nga komosyon hasta sa makaabot raya sa guwa it baeay it biktima nga nagatan-aw it telebisyon it mga oras ngato.
Bangud sa nabatian nga sangag hay gumuwa ro biktima sa andang baeay kung siin igto ro suspek ag imaw hay ginbuno kara.
Insigida man nga naaresto ro suspek ag narekober kana ro bolo o utak nga may habang 19 pulgada.
Kulong eon makarun sa Kalibo MPS ro suspek nga nakataeana nga pasakaan it kaso. // ANN DESLENE SALAZAR
