Gintugutan han korte ha Leyte nga makapagpiyansa an self-confessed drug lord nga hi Rolan Kerwin Espinosa ngan upat nga iba nga dabi ha kaso nga mayda kaabutan ha illegal drug trading.
Basar ha desisyon han Baybay Regional Trial Court, igin-isplikar hini nga napakyas an prosekusyon nga mapamatud-an nga guilty an mga akusado.
Kalakip naman ha mga gintugutan nga makapag piyansa in hira Alfred Batistis, Bryan Anthony Zaldivar, Jose Antipuesto, ngan Marcelo Adorco.
Subay ha korte nga an pag-amin ni Espinosa in deri sadang nga basehan para ha paghatol matungod ha kawarayan daw han gintatawag nga corpus delicti nga nangangaruyag signgon nga an krimen in dapat mapamatud-an nga natabo san o tagan hin hatol hi Espinosa.
Igindugang pa han korte, nga waray eyewitnesses ha nasabi nga krimen nga positibo nga makakapagtudlok kan Espinosa ha mga igkasi akusado.
Sugadman, ginbasura gihapon han korte an drug case kontra ha tatay ni Espinosa nga hi anay Albuera Mayor Rolando Espinosa nga napatay ha gindumara nga drug raid ha sakob han presuhan dida han November 5, 2016.
Hi KerwinEspinosa ngan an iya igkasi akusado in nag-aatubang la gihapon ha kaso nga mayda kalabutan ha pagtalapas ha Section 26 nga mayda kalabutan ha Section 5. Article II han Comprehensive Dangerous Drug Act of 2022 .
Mahinunumduman, gin-amin ni Espinosa dida han 2017 ha usa nga hearing ha senado nga naghatag hiya hin drug payoffs ha mga anay opisyal han Philippine National Police ngan Philippine Drug Enforcement Agency kabalyu han proteksyon han iya illegal drug trade ha Sinirangan Bisayas.
