BISAN sa sunod sunod nga pagpamusil ug mga robbery incident sa GenSan, kini ang wala matud pa nakaapekto sa kinatibuk-ang seguridad sa dakbayan.
Kini ang giluwatan ni PL Col. Aldrin Gonzales, tigpamaba sa General Santos City Police Office human sa pagpusil patay sa usa ka purok tanod ug sa pagpanulis sa usa ka iladong bakeshop sa GenSan.
Segun pa ni Gonzales aminado kini nga naalarma ang katawhan apan kining maong mga insidente wala nakapugong sa katawhan sa ilang normal nga gimbuhaton.
Ginahimo usab sa kapulisan ang ilang trabaho aron masulbad ang maong mga krimen tungod ginasingil usab sila sa higher headquarters.
Wala usab timeline ang kapulisan sa pagsulbad sa mga nahisgutang pagpamusil ug robbery incident tungod dili gustong makompromiso ang imbestigasyon.
Awhag na lamang niini sa katawhan labi na sa 24/7 nga mga establisyemento nga magbutang og guwardiya o CCTV aron makatabang sa kasulbaran sa unsa mang krimen.
Nasayran nga sulod lang sa bulan sa Agosto, may upat ka insidente na sa pagpamusil ug pipila ka robbery incident.
