MIAPELA ang protected area superintendent (PASu) sa Sarangani og tabang sa problema sa dap-ag o Crown of Thorns (COT). Matud ni Cirilo Lagnason Jr, deputy sa PASu kinahanglan nila ang tabang sa mga scuba divers, dugang technical experts, Non- Government Organization (NGO).
Lakip ang Civil Society Groups (CSO) ug ubang stakeholders ug mga kompanya sa pagresolba aron maprotektahan ang coral reef. Apektado na niini ang Glan, parte sa Kiamba ug Malapatan sa Sarangani samtang gikumpirma kung duna’y dap-ag sa coastal area sa Bula, GenSan.
Nagdeklara na sila og ‘outbreak’ tungod sa kadaghan sa mga dap-ag, delikado ang COT gumikan tukbon niini ang mga corals. Kabalaka sa opisyal nga sa kadaghan niini nahimo na kining ecological disturbance sa coral reef system.
Kung wala na’y corals, wala na’y kabalayan ang mga isda, dugang ni Lagnason Jr. Ang dap-ag ang ‘starfish’ ang characterized nga daghan og spines naa sa iyang body wall. Duna kini dakong central disk ug dunay pito hangtud 23 arms. I Richel Gubalani
